تعالووووووووووووووو شوفو قصتي بيني وبين حذائي

خايبين اشونكم الخاطر الله
مشتااقلكم صالي اشكد مجاي اهنا
شنو هل تغيرات
مشرفين جدد مبروك الاشراف
هسه اني شعليه
المهم تعالو شوفو اصار بيه اني والحذااء مالتي





حدثت هذه السالفة قبل أسبوع تقريبا ,,او مو اسبوع بالضبط قبل 3 اشهر , جان يوم جمعة الموافق أربعاء ,, كعدت من الصبح ,, اي قابل ابقة نايم دب خوما دب ,, المهم كعدت واتغديت لان الريوك جان بعدة ما امحضر ,, و بدلت و كمت ادور على حذائي حتى البسه (البسه يعني من يسلم عليه ما اجاوبه) ,,
ساعة ادور و ماكو الحذاء ,, ما خليت مكان ,, جوة المخدة ,, بالثلاجة ,, بجيوب بنطروني ,, وين ولة الحذاء ما اعرف ,تالي كعدت افكر ,, الحذاء منطيه الاحد؟ علي التعبان يلبس 55 مو رجل زوج تايتنك عنده ,ما يفيده , جبار رجليه مكصوصة ثنيناتهن لان طك عندة المصران الاعور ما يحتاجه , هاي شلون شغلة ولكم يمعودين حذائي وين؟ اي شلبس فوك الجواريب فانيله؟؟ , كعدت ابوية كتله انباكينا ,, ابوية فز كلي ولك شنباكينا؟ كتلة حذائي خطفو ,,
باوع عليه و كلي امشي دفرة بيك انتة و الحذاء ,,
المهم لكيت الفردة اليمنة بأخر مكان جنت اتوقعه ,, جوة الكنتور ,,
و الفردة اليسرة و يا للعجب المعجاب ,, شفتها تمشي وحدها و من الفتحة مال الحذاء شفت دخان ,اشتبهت بحذائي انكلب منقله ,, كلت ابحوش بي بلكت الكه شيش تكة ,
اني ضجت و كعدت افكر هذا منو ديحرك زبل جوة حذائي؟
و ظل الدخان يصعد من الحذاء اتكول مو حذاء عبالك طاوة و ناسين الدهن عليها ,,
الدخان صار غيمة ,, كلت راح تمطر ,, وكفت جوة البنكة كي لا اتبلل ,, و هناك تشكل الغيم على هيئة مارد صغير طوله قنينتين مال غاز وحدة فوك اللخ ,, مدعبل اللشه معلوس الجهرة لحيته تفتح محل مال اقمشه ,,
ضحك و قهقه و قال
هع هع هع هع هع انا الجني فوزي ,, (اكو جني اسمع فوزي؟؟وشبيك فرحان عبالك توك شارب ميرندة) أأمر تطاع سيدي فوزي
باوعت عليه ,, شكله تعبان ,, لوما شفته بعيني طلع من الحذاء جان انطيته 750 و صعدته كيا و رجعته لبيت امه ,, هذا شلون مارد اللي امبهذل ,و هاي شنو لحيته؟؟ لحيته اكبر منة ب 3 سنين ,لو يزينها بكوسرة ما تنشال ,, الا يفرمتها يلا ,,, يعني يا ربي يوم اللي التقي بجني ,, يجيني الجايجي مال الجن؟؟ هو هم حظي
- اخوية انتة صدك جني ؟ خاف جني مكلف .,,؟؟لو واحد صاحبي بايت بقندرتي و دتنصب عليه؟؟
- اخوية اني جني اصلي شنو هال حجي اني اعتبر من الرجال المهمين في عالم الجن
- قصدك في عالم البعشيقة ,,
- يعني ما امصدك؟؟
- هويتك ,, بطاقة السكن مال الفانوس مالتك ,رقم الشاصي مال السيارة اللي جيت بيها (تالي اتذكرت هذا استعمل حذائي تاكسي و أجه بي ), انتو الجن مو تطلعون من فانوس؟ شدخلك حذائي ؟ شنو جني مهجر انتة؟
- اخوية أأمر اي شي اسويلكيا ,, و عوف الحجي هذا
- اريد قلم جاف
- بابا اني جني اطلب شي اكثر من هاي ,, قلم جاف شنو؟؟
- اكثر من هيجي شي؟ اوكي اريد 8 اقلام جاف ,,
الجني باوع عليه و قه قه ,, لو اعرف هذا المخبل على شنو يضحك ما اعرف ,, مكتوب على كصتي مزحة او فكاهة ما اعرف ,, الشافط ضحك و لكيت جوة رجليه 7 أقلام جايف ,قصدي جاف
- هااا من هسة بدة الخمط؟؟ بعد قلم
- رئيس الجن اخذه خاوة ,, و بقالك ذولة
- بس اني ردت 8 على عدد ايام الاسبوع حتى اسوي جدول يومية قلم
- ليش ايام الاسبوع 8؟؟
- اي نازل يوم جديد اسمه سداساء ورة الخميس و قبل الثلاثاء يموت ,, صاك للبنكه ,,
- على كل حال هذا هوة طلبك هع هع هع (قهقهة مال مخابيل بحيث امي من المطبخ صاحت شبيك وليدي عمار هم اننتلت بالنفاضة ؟؟
- لااا يوم لاااا ,,, أننتل بالنفاضة شلون يعني ,, جكارة امبلله اني؟
انداريت عال جني و كتله ,, اوكي لعد اريدك اتطلعلني للسويد ,,,
- جيب دفترين و اطلعلك
ايا ابن العفريت , لك هو انتة جني لو قجغجي؟؟
قهقه الجني مرة أخرى (الفطير ابن الفطير ولا يجوز) و كلي
- اكو طلب راح اسويلكيا و اتعيش كل عمر ملك الملوك
اني كيفت ,, هيجي طلب ,, اكيد سالفة ضخمة ,, احتمال راح يجيبلي طوبة كريكر العب بيها بالطرمة او يزوجني جنية واخلف من وراها جنيين ,, و يفوتون لعراق هوسة يخوفون المشرفين ,, وعلي التعبان وياسر
لكن ,, قبل ما الجني يكمل حجايته اندك الموبايل مالته ,, طلعه و كعد يحجي
- اي يابه ,, لالا ما اتأخر ,, شنو ؟؟ جيس صمون و بطل خل؟؟ و 20 محسن للمولدة (مو اكلكم اعوى جني بالمجموعة الشمسية اجاني؟؟) ماشي يابه ,, انشالله ما اتاخر ,, حسب الازدحام ,,
و اندار عليه و كلي اخوية لازم اتطلع مستعجل ,, بصراحة القانوس انضرب بجم و بالحي الصناعي ديعدلو ,, راح اداين منك الحذاء
اني بديت اعترض و حاولت اشرحله انه ما متعود اطلع و رجليه كرعة بالشارع ,, لكن الجني كلي
اسمع ولك دير بالك تفتح حلكك,, ترة هسة اسحرك و اشخطك ليفة ,, يلا اودعناك
- يمعووود ابو الغيرة ,,جني قوزي ,, قصدي فوزي ,, و الطلب اللي كتلي عليه
اجاني صوتة من بعيد يكلي بعدين بعدين ارجعلك
تالي اتذكرت انه الحذاء ما أمرقم ,, و اكيد المرور راح يلزمو ,, و حتى لو كللهم بي رقم (42) فاليوم فردي,, يعني هم مراح يخلص منهم ,,
تك حذائي هم كام يمشي وحدة ورة ما الغيم مال الجني بده يفوت جوة الحذاء ,,
و اختفة من البيت ,,
بعد 4 ايام ,,
فاتت امي دا اتعزل الغرفة ,, انتبهت على شغله ,,
- ابني وين تك حذائك اليسرة؟
- ياهو؟
- الاسود ابو البوز
- مراح اتصدكين
- شنو؟؟
- راح يجيب صمون و بطل خل !!!!

عااااااااااااا
خلصت